KAMATAYON-PROBLEMA

Ato na nga post dinhi kon ngano nga naay mga tawo nga korap. Gani ato na nga gipangutana si Vice Mayor Bemebem nahitungod niini ug ato gi-post sa miagi nga ang nagbinbin nga kamatayon sa tawo maoy usa sa ga hinungdan. Apan diyutay ra man god ang nasayud nga kinabuhing korap maoy gipili sa tawo didto sa Balaang Harden sa Diyos diin nakapuyo si Tatay Adan ug Nanay Eba. Sa hamubo nga pakisayud; ang korapsyon maoy gipili nila nga pamaagi sa pagkinabuhi sa tawo. Pagkinabuhi nga mamatay ra. Kini maoy hinungdan nga gipakanaug sa Diyos ang iyang bugtong anak-si Ginoong Hesus ang ikaduhang Adan aron ang tawo nga mamatay ra, matawo pag-usab aron maka ambit sa kinabuhi sa ikaduhang Adan nga walay kinotuban, walay kataposan, wala nay kamatayon. Wagtangon ang korapsyon. Sa pagkakaron, problema gyud ang kamatayon apan diha kang Ginoong Hesu-Kristo wagtang ang kamatayon.