PAHINUMDOM LANG

Ang kinabuhing tawhanon limitado lamang dinhi ning kalibutan. Mubo ra ang panahon sa pagpuyo diin sama sa yamog sa sayong kabuntagon mabatyagan ug mahikap apan pagsidlak sa adlaw kini mawala ug mahanao. Tungod sa desisyon ni Nanay Eba ug Tatay Adan nga mokaon sa gidili sa Diyos kanila naangin tanan tawo sukad niadto ug makapaabot gyud sa resultado nga kamatayon BISAN KINSA. Karon higayuna diin gipamalandong ang kamatayon ni Ginoong Hesus didto sa kalbaryo. Apan luyo sa iyang pagkamatay, miabot man pod hinoon ang iyang pagkabanhaw. Hitabo nga maoy nakahatag sa buhing paglaum nga diay adunay tambal ang gikahadlokang kamantayon. Sa kabanhawan sa Ginoo, ang tawo may makuhang saad nga mabuhi pag-usab luyo sa sigurong pagkamatay tungod sa sala. Si Ginoong Hesus mao ang KABANHAWAN SA TANAN.